काठमाडौं । सरकारले आगामी आर्थिक वर्षका लागि ल्याएको बजेटको आकार १९ खर्ब ६४ अर्ब ११ करोडको बजेट रहेको छ । बिहीबार बसेको संघीय संसदको संयुक्त बैठकमा अर्थमन्त्री विष्णु पौडेलले बजेट सार्वजनिक गरेका हुन् ।
चालु तर्फ ११ खर्ब ८० अर्ब ९८ करोड अर्थात् ६०.१ प्रतिशत, पूँजीगत गर्फ ४ खर्ब ७ अर्ब ८९ करोड अर्थात २०.८ प्रतिशत तथा वित्तिय तर्फ ३ खर्ब ७५ अर्ब २४ करोड अर्थात १९.१ प्रतिशत नयाँ बजेट विनीयोजन भएको हो ।
आर्थिक वर्ष २०८२/०८३ का लागि प्रस्तुत बजेट यस वर्षको सुरुको विनियोजनको तुलनामा ५/६ प्रतिशतले बढी र संशोधनको तुलनामा १८/२ प्रतिशतले बढी हो । चालु आर्थिक वर्षका लागि सरकारले १८ खर्ब ६० अर्ब ३० करोडको बजेट विनियोजन गरेको थियो ।
उक्त बजेटका लागि स्रोतका रूपमा राजस्वबाट १३ खर्ब १५ अर्ब, आन्तरिक ऋणबाट ३ खर्ब ६२ अर्ब, बाह्य ऋणबाट २ खर्ब ३३ अर्ब र अनुदानबाट ५३ अर्ब रूपैयाँ जुटाइने अनुमान गरिएको छ ।
सरकारले आर्थिक वर्ष २०८२/ २०८३ का लागि आगामी आवका लागि ६ प्रतिशतको आर्थिक वृद्धिको लक्ष्य राखेको छ । अर्थमन्त्री पौडेलले आगामी आर्थिक वर्षको बजेट वक्तव्य पेस गदै सरकारको वार्षिक नीति तथा कार्यक्रम र बजेटले प्रस्ताव गरेका योजना तथा कार्यक्रमले उक्त आर्थिक वृद्धि हासिल गर्ने विश्वास व्यक्त गरेका हुन् ।
त्यस्तै, आगामी आर्थिक वर्षका लागि सरकारले मुद्रास्फीति ५.५ प्रतिशतको वाञ्छित सीमाभित्र राख्ने लक्ष्य राखेको छ ।
