दाङ, घोराही — राप्ती स्वास्थ्य विज्ञान प्रतिष्ठानमा उपचारका लागि आउने बिरामीहरू लामो समयसम्म पालोको प्रतीक्षामा बस्न बाध्य छन्। बिहान सबेरै फारम भरेर आएका बिरामीहरूको पालो दिउँसो दुई बजेसम्म पनि नआउँदा उनीहरू आक्रोशित भएका छन्।

स्थानीयहरूका अनुसार, अस्पतालमा बिहान १० बजे नै फारम भरेर बस्ने बिरामीहरूको पालो आउँदैन तर केही बिरामीहरू जो केवल २० मिनेटअघि मात्रै आउने गर्छन्, उनीहरूको उपचार तुरुन्तै गरिन्छ। यसले अस्पतालभित्र ‘पहुँच र सिफारिस प्रणाली’ चलिरहेको शंका उत्पन्न गरेको छ।

एक बिरामीकी नातेदारका अनुसार, “हामी बिहान १० बजे नै फारम भरेर बसेका थियौं, तर २ बज्दा पनि पालो आएन। तर केही बिरामीहरू पछि आएर पनि तुरुन्त भित्र प्रवेश गरे। यस्तो अन्याय किन हुन्छ भनेर सोध्दा कसैले जवाफ दिएन।”

अस्पताल प्रशासनले भने व्यस्तता र बिरामीको संख्या बढी भएकाले ढिलाइ हुने गरेको स्पष्टीकरण दिने गर्छ। तर बिरामीहरूको भनाईमा यो समस्या व्यवस्थापनको कमी र आन्तरिक अनुशासनहीनताका कारण भएको हो।

राप्ती स्वास्थ्य विज्ञान प्रतिष्ठान प्रदेशकै प्रमुख सरकारी शिक्षण अस्पतालमध्ये एक हो। यहाँ दाङ र वरपरका जिल्लाबाट दैनिक सयौँ बिरामी उपचारका लागि आउँछन्। तर सेवा प्रणाली सुधार नहुँदा धेरै बिरामीहरू उपचारभन्दा बढी पर्खाइ र असमान व्यवहारको पीडा अनुभव गरिरहेका छन्।

स्थानीय नागरिक अधिकारकर्मीहरूका अनुसार, यस्तो अवस्था लामो समयदेखि दोहोरिँदै आएको छ। उनीहरूको भनाइमा, “सरकारी अस्पतालमा सबै बिरामीलाई बराबर व्यवहार हुनुपर्छ, तर यहाँ पहुँच भएका व्यक्तिहरूलाई प्राथमिकता दिइन्छ भन्ने गुनासो बढ्दो छ।”

सहर्षन्युजको लागि हिमाल भुसालको रिपोर्ट