काठमाडौँ। फिफा विश्वकप २०२६ को समूह ‘बी’ सबैभन्दा सजिलो समूहको रूपमा चर्चा हुन थालेको छ। आयोजक क्यानाडासँगै बोस्निया र हर्जगोभिना, कतार र स्विट्जरल्यान्ड रहेको यो समूहमा स्विट्जरल्याण्ड निकै बलियो टोलीको रुपमा रहेको छ । यही कारणले धेरै फुटबल विश्लेषकहरूले यसलाई अनुमानित नतिजा निकाल्न सक्ने समूह भनेर वर्णन गरेका छन्।

घरेलु मैदानमा खेल्ने क्यानडामाथि ठूलो अपेक्षा हुनेछ। अर्कोतर्फ स्विट्जरल्याण्ड अनुभवी टोलीका रूपमा परिचित छ। कतार फेरि एकपटक विश्व फुटबलमा आफूलाई प्रमाणित गर्न चाहन्छ भने बोस्निया र हर्जगोभिना भावनात्मक ऊर्जा र अनुभवसहित ‘डार्क हर्स’ बन्न सक्छ।

क्यानडा : घरेलु समर्थकको सपना र तीव्र फुटबल

क्यानडा अहिले इतिहासकै सबैभन्दा प्रतिभाशाली पुस्तासहित विश्वकपमा उत्रिँदैछ। घरेलु समर्थक, आधुनिक फुटबल संरचना र तीव्र खेल शैलीका कारण क्यानडालाई समूह चरण पार गर्ने बलियो दाबेदार मानिएको छ। क्यानडाका लागि सबैभन्दा ठूलो नाम हुन् अल्फोन्सो डेभिस।  उनी एक प्रसिद्ध व्यावसायिक फुटबल खेलाडी हुन्, जो जर्मन क्लब बायर्न म्युनिखको टोलीबाट बाँया-ब्याक वा विङ्गरको रूपमा खेल्छन्।। उनको गति, आक्रमणमा योगदान र नेतृत्व क्षमताले क्यानडालाई निकै खतरनाक बनाउँछ। जोनाथन डेभिड टोलीका मुख्य गोलकर्ता हुन् भने स्टिफन इउस्टाकियो मिडफिल्डको दिमाग मानिन्छन्।

इस्माएल कोने माथि पनि विशेष नजर रहनेछ। मिडफिल्डमा उनको ऊर्जा र बल अघि बढाउने क्षमता प्रतियोगितामा निर्णायक हुन सक्छ। त्यस्तै टानी ओलुवासेयी क्यानडाका लागि सरप्राइज प्याकेज बन्न सक्ने खेलाडीका रूपमा हेरिएका छन्। क्यानडाको सबैभन्दा ठूलो चुनौती भनेको ठूलो प्रतियोगितामा अनुभवको कमी हो। घरेलु समर्थकको अत्यधिक अपेक्षाले कहिलेकाहीँ दबाब सिर्जना गर्न सक्छ।

स्विट्जरल्याण्ड : चुपचाप आउने तर सधैं खतरनाक टोली

स्विट्जरल्याण्ड विश्व फुटबलको सबैभन्दा अनुशासित टोलीमध्ये एक हो। उनीहरू धेरै चर्चामा नआए पनि ठूला प्रतियोगितामा लगातार राम्रो प्रदर्शन गर्ने टोलीका रूपमा परिचित छन्।

ग्रानिट झाका अझै टोलीको मुटु हुन्। उनको नेतृत्व, पासिङ र खेल पढ्ने क्षमता स्विस टोलीको सबैभन्दा ठूलो बल हो। म्यानुएल अकान्जी डिफेन्सका आधारस्तम्भ हुन् भने ब्रेल एम्बोलो काउन्टर अट्याकमा निकै घातक हुन सक्छन्। स्विट्जरल्याण्डको सबैभन्दा ठूलो विशेषता भनेको उनीहरूको मानसिक स्थिरता हो। उनीहरू दबाबमा पनि आफ्नो संरचना भत्काउन चाहँदैनन्। यही कारणले धेरै विश्लेषकहरूले यस समूहको वास्तविक फेभरेट स्विट्जरल्याण्डलाई मानेका छन्।

कतार : एशियन च्याम्पियनको आत्मविश्वास

कतारलाई धेरैले अझै पनि २०२२ को आयोजक टोलीकै रूपमा हेर्छन्। तर पछिल्ला वर्षमा उनीहरूले एशियन फुटबलमा आफ्नो स्तर प्रमाणित गरिसकेका छन्। अक्रम अफिफ टोलीका सबैभन्दा रचनात्मक खेलाडी हुन्। उनको ड्रिब्लिङ, पासिङ र निर्णायक क्षणमा खेल बदल्ने क्षमता कतारको मुख्य हतियार हुनेछ। अल्मोइज अली अझै टोलीका महत्वपूर्ण स्ट्राइकर हुन्।

तर कतारको कमजोरी भनेको युरोपियन टोलीविरुद्ध देखिने रक्षात्मक अस्थिरता हो। बल नियन्त्रण राम्रो भए पनि उच्च प्रेसिङ टोलीविरुद्ध उनीहरू संघर्ष गर्न सक्छन्।

बोस्निया एन्ड हर्जेगोभिना : भावनाले भरिएको ‘डार्क हर्स’

बोस्निया एन्ड हर्जेगोभिना लामो अन्तरालपछि विश्वकपमा फर्किएको टोली हो। उनीहरूलाई धेरैले कमजोर माने पनि अनुभवी खेलाडी र भावनात्मक ऊर्जा उनीहरूको सबैभन्दा ठूलो शक्ति हो।

सबैको ध्यान स्वाभाविक रूपमा एदिन जेको माथि हुनेछ। उमेर बढे पनि उनी अझै टोलीका प्रमुख गोलकर्ता र प्रेरणाका स्रोत हुन्। बेंजामिन ताहिरोविच र एर्मेदिन दे मिरोविच टोलीका महत्वपूर्ण नाम हुन्। युवा खेलाडी केरिमा अलाजबेगोभिकलाई भविष्यको स्टारका रूपमा हेरिएको छ। 

बोस्नियाको खेल शैली दुवै शारीरिक र भावनात्मक छ। यदि उनीहरूले सुरुवाती खेलमा सकारात्मक नतिजा निकाले भने यो टोली निकै खतरनाक बन्न सक्छ।

को पुग्ला अर्को चरणमा ?

कागजमा हेर्दा स्विट्जरल्यान्ड समूहको सबैभन्दा सन्तुलित टोली देखिन्छ। क्यानाडा घरेलु समर्थनका कारण बलियो दाबेदार हो। तर बोस्निया र हर्जगोभिना र कतारले पनि कुनै पनि खेल उल्ट्याउने क्षमता राख्छन्।

सहर्ष न्युज अनुमान:

पहिलो : स्विट्जरल्यान्ड
दोस्रो : क्यानाडा
तेस्रो : बोस्निया र हर्जगोभिना
चौथो : कतार 

तर ४८ टोलीको नयाँ ढाँचामा तेस्रो हुने टोलीलाई पनि अर्को चरण पुग्ने अवसर रहने भएकाले बोस्निया र हर्जगोभिना वा कतारलाई पूर्ण रूपमा बाहिर मान्न सकिँदैन।

केही रोचक तथ्य :
क्यानाडा पहिलो पटक विश्वकप आयोजक बनेको हो।
स्विट्जरल्याण्ड लगातार सातौं विश्वकप खेल्दैछ।
कतार पहिलो पटक आयोजक नभई एसियन क्वालिफिकेसन मार्फत विश्वकप पुगेको टोली हो।
बोस्निया र हर्जगोभिना २०१४ पछि पहिलो पटक विश्वकपमा फर्किएको छ।

समूह ‘बी’ बाहिरबाट हेर्दा शान्त देखिए पनि वास्तवमा यो रणनीति, मानसिक बल र सानो गल्तीले तय हुने समूह बन्न सक्छ। यहाँ एउटा अप्रत्याशित गोलले पूरा समूहको समीकरण उल्ट्याउन सक्छ।