काठमाडौँ। अमेरिका, क्यानडा र मेक्सिकोले संयुक्त रूपमा आयोजना गर्ने २०२६ फिफा विश्वकपको समूह ‘ए’ अहिले नै सबैभन्दा रोचक र अनिश्चित समूहको रूपमा चर्चा हुन थालेको छ। आयोजक मेक्सिकोसँगै दक्षिण अफ्रिका, चेक गणतन्त्र र दक्षिण कोरिया रहेको यो समूहमा चारै टोलीको खेल शैली पूर्ण रूपमा फरक छ। फुटबल पण्डितहरूका अनुसार यो “सन्तुलित तर खतरनाक” समूह हो, जहाँ सानो गल्तीले पनि टोलीलाई बाहिर धकेल्न सक्छ।

समूह ‘ए’ को सबैभन्दा ठूलो सनसनी भनेको घरेलु मैदानमा खेल्ने मेक्सिकोमाथिको दबाब हो। विश्वकप इतिहासमा लगातार ‘राउन्ड अफ १६’ मा रोकिँदै आएको मेक्सिको यसपटक आफ्नै समर्थकको अगाडि ठूलो उपलब्धि खोजिरहेको छ। विशेषगरी मेक्सिको सिटीको उच्च उचाइ र एस्टाडियो अज़्टेका रंगशालाको वातावरण विपक्षीका लागि निकै कठिन मानिन्छ।

मेक्सिको : घरेलु समर्थन र भावनाको भार

ए सी मिलनबाट खेलिरहेका स्यान्टियागो गिमेनेज अहिले मेक्सिकोका सबैभन्दा महत्वपूर्ण र आक्रमणकारी खेलाडी मानिएका छन्। युरोपियन क्लब फुटबलमा उनको फिनिसिङ क्षमता उत्कृष्ट देखिएको छ। त्यस्तै कप्तान एडसन अल्भारेज मिडफिल्डको ‘इन्जिन’ हुन्, जसले टोलीको गति नियन्त्रण गर्छन्। अनुभवी राउल जिमेनेज र हिरविङ लोजानो अझै निर्णायक क्षणमा खेल बदल्न सक्षम छन्।

मेक्सिकोका लागि योहान वास्केझको खेल पनि निकै महत्त्वपूर्ण हुन सक्छ। डिफेन्समा उनको स्थिरता र आक्रामक टोलीविरुद्धको ट्याक्टिकल अनुशासनले मेक्सिकोलाई मजबुत बनाउन सक्छ।

दक्षिण कोरिया : सन् २००२ को सपना दोहोर्याउने प्रयास

एशियाबाट सबैभन्दा अनुभवी टोलीमध्ये एक दक्षिण कोरिया यसपटक पनि तीव्र गति, प्रेसिङ र अनुशासित फुटबलसहित मैदान उत्रिनेछ। सबैको नजर स्वाभाविक रूपमा सोन ह्युङ-मिन माथि रहनेछ। सम्भवतः उनको अन्तिम विश्वकप भएकाले पनि उनी भावनात्मक रूपमा अझ खतरनाक बन्न सक्छन्। तर कोरियाको वास्तविक खतरा हुन सक्छन् ली कांग-इन। प्यारिस सेन्ट-जर्मेनबाट खेलिरहेका लि उनको सिर्जनात्मक पास, ड्रिब्लिङ र सेट–पिस क्षमताले समूह चरणको खेल बदल्न सक्छ। साथै अण्डर रेटेड खेलाडीको रूपमा ह्यांग इन-ब्योमलाई हेरिएको छ, जसले मिडफिल्डमा खेलको लय नियन्त्रण गर्न सक्छन्।

दक्षिण कोरियाको समस्या भनेको डिफेन्समा कहिलेकाहीँ देखिने अस्थिरता हो। बलियो युरोपियन टोलीविरुद्ध उनीहरू दबाबमा पर्न सक्छन्।

चेक गणतन्त्र : समूहको ‘डार्क हर्स’

धेरै समर्थकले कम आँकलन गरे पनि चेक गणतन्त्र यो समूहको सबैभन्दा खतरनाक टोली हुन सक्छ। शारीरिक रूपमा बलियो, सेट–पिसमा उत्कृष्ट र फुटबल टुर्नामेन्टमा अनुशासित खेल्ने शैली उनीहरूको विशेषता हो।

चेकका लागि सबैभन्दा महत्वपूर्ण नाम हुन् पेट्रिक शिक। थोरै अवसरमा गोल गर्न सक्ने स्ट्राइकरको रूपमा उनको पहिचान छ। त्यस्तै तोमास सुकले चेकका लागि मिडफिल्डमा शक्तिशाली उपस्थिति प्रधान गर्नेछन।

चेकका आदम ह्लोझेक माथि पनि विशेष नजर रहनेछ। उनको गति र ट्रान्जिसन फुटबलले मेक्सिको वा कोरियालाई समस्या दिन सक्छ।

दक्षिण अफ्रिका : दबाबबिनाको टोली, तर खतरनाक

दक्षिण अफ्रिकालाई धेरैले समूहको कमजोर टोली माने पनि उनीहरूलाई सजिलै हराउन सकिँदैन। अफ्रिकी टोलीहरूको शारीरिक क्षमता, काउन्टर–अट्याक र सेट–पिसमा खतरा सधैं रहन्छ।

गोलकिपर रोनवेन विलियम्स टोलीका मुख्य आशा हुन्। उनले एक्लै खेल बचाउन सक्ने क्षमता राख्छन्। त्यस्तै पर्सी टाउको अनुभव पनि महत्वपूर्ण हुनेछ। युवा विंगर ओस्विन एपोलिसले प्रतियोगितामा चम्कन सक्ने चर्चा बटुली रहेका छन्। यदि दक्षिण अफ्रिकाले पहिलो खेलमा मेक्सिकोलाई रोक्न सफल भयो भने समूहको समीकरण नै बदलिन सक्छ।

को पुग्ला नकआउट चरणमा ?

कागजमा हेर्दा मेक्सिको समूह विजेता बन्ने सम्भावना धेरै देखिन्छ। घरेलु मैदान, समर्थक मेक्सिकोको सबैभन्दा ठूलो शक्ति हो। दोस्रो स्थानका लागि भने दक्षिण कोरिया र चेकियाबीच कडा प्रतिस्पर्धा हुने अनुमान गरिएको छ।

सहर्ष न्युज अनुमान:

पहिलो : मेक्सिको
दोस्रो : चेक गणतन्त्र 
तेस्रो  : दक्षिण कोरिया
चौथो : दक्षिण अफ्रिका

तर ४८ टोलीको नयाँ ढाँचामा तेस्रो हुने टोलीलाई पनि अर्को चरण पुग्ने मौका रहने भएकाले दक्षिण कोरियाको सम्भावना समाप्त हुँदैन।

केही रोचक तथ्य
*मेक्सिकोले तेस्रो पटक विश्वकप आयोजना गर्दैछ।
*दक्षिण कोरियाले सन् २००२ मा सेमिफाइनल पुगेर इतिहास रचेको थियो।
*चेकिया विश्वकपमा लामो अन्तरालपछि फर्किएको टोली हो।
*दक्षिण अफ्रिकाले २०१० पछि पहिलो पटक विश्वकप खेल्दैछ।

समूह ‘ए’ सम्भवतः विश्वकप २०२६ को सबैभन्दा “अनपेक्षित” समूह बन्न सक्छ। यहाँ कुनै पनि टोली पूर्ण रूपमा सुरक्षित छैन, र एउटा शानदार प्रदर्शनले कुनै पनि देशलाई अचानक नकआउट चरणमा पुर्‍याउन सक्छ।