यज्ञ कार्की, संखुवासभा । संखुवासभा जिल्लाको मादी नगरपालिका २ मंगलबारे बजारमा रहेको ‘गोठ द होटल’ नामको होमस्टेमा आगलागी भएको छ । खाना पकाउन ग्याँस सिलिण्डर पड्किएर भएको उक्त विशाल आगलागीबाट होटल पूर्णरुपमा जलेर नष्ट भएको छ ।
आगलागीबाट कुनै मानबीय क्षति नभए पनि ५० लाख बराबरको आर्थिक क्षति भएको प्रारम्भीक अनुमान लगाइएको छ ।
गुराँसको राजधानी पर्यटकीय क्षेत्र तीनजुरे मिल्के जलजले (टीएमजे) मा करिब ५०लाख लगानीमा उक्त होमस्टे स्थापना गरिएको थियो ।
स्वदेशीका साथै विदेशी पर्यटकहरुसमेतलाई लक्षित गरेर सञ्चालनमा ल्याइएको गोठ द होटल यो क्षेत्रकै सबैभन्दा ठूलो लगानीमा खोलिएको पहिलो र एकमात्र होमस्टे थियो ।
युरोपका विभिन्न रेष्टुरेन्ट तथा पाँचतारे होटलमा समेतको अनुभव बटुलेर युरोपको आकर्षक कमाई समेत छाडेर स्वदेशमै केही गरौं भन्ने सोचका साथ उत्साहित स्थानीय युवा मुराहरि घिमिरेले उक्त होटल सञ्चालनमा ल्याएका थिए ।
