काठमाडौं । काठमाडौंको तीनकुनेमा मूख्य कार्यालय रहेको सभ्य समाज बहुउद्देश्यीय सहकारी संस्था लिमिटेडको चौधौं वार्षिक साधारणसभा सम्पन्न भयो । संस्थाका अध्यक्ष कृष्णबहादुर बिष्टको अध्यक्षतामा सम्पन्न उक्त सभामा विशिष्ठ अतिथिको रुपमा माधवप्रसाद न्यौपाने र अतिथिको रुपमा कुमार राईको उपस्थिति रहेको थियो । संस्थाले यसपटक सभामा कसैलाई पनि प्रमुख अतिथिको रुपमा आमन्त्रित गरेको थिएन । सभामा उपस्थित शेयर सदस्यहरु मध्येवाटै जेष्ठ र उच्च अहोदामा रहेका व्यक्तिहरु मध्येवाट छनौट गरी पूर्वसीडीयो समेत रहिसक्नुभएका संस्थाका शेयरधनी न्यौपानेलाई विशिष्ट अतिथि र पूर्वशिक्षक राईलाई अतिथि बनाएको थियो ।

सभामा विशिष्ट अतिथि तथा अतिथिले सहकारी क्षेत्रमा देखिएको विसम परिस्थितिका बीच पनि सदस्यहरुलाई चित्त बुझ्दो सेवा प्रदान गर्न सफल भएकोमा खुशी व्यक्त गर्दै साधारणसभाको सफलताको शुभकामना दिनुभएका थियो ।

सभामा सञ्चालक समितिका तर्फबाट अध्यक्ष बिष्टले पेश गर्नुभएको २०८०/०८१ को वार्षिक प्रतिवेदन र आ.व. ०८१/०८२ को लागि तय गरिएको वार्षिक नीति तथा कार्यक्रम एवं बजेट र अन्य व्यवस्थाहरु समेत पारित भएको थियो । त्यसैगरी सभामा अध्यक्ष बिष्टले संस्थामा २४२९ सदस्य रहेको, शेयर पुँजी २ करोड ७० लाख ८६ हजार ७ सय रुपैयाँ रहेको, बचत संकलन २३ करोड १७ लाख ७४ हजार ७ सय ४७ रुपैयाँ निक्षेप रहेको र २२ करोड १२ लाख ६६ हजार ३ रुपैयाँ रहेको जानकारी गराउनुभएको थियो । त्यस्तै उहाँले संस्थाको कुल सम्पत्ति ३० करोड ६५ लाख ६३ हजार ६२ रुपैयाँ रहेको पनि जानकारी दिनुभयो ।

त्यसैगरी सभामा लेखा समितिको तर्फबाट संयोजक माधबप्रसाद खरेलले लेखा सुपरीवेक्षण समितिको प्रतिवेदन पेश गर्नुभएको थियो । त्यस्तै सभाले संस्थाको उद्देश्य परिवर्तन गर्ने, कार्यकारी प्रमुखको पारिश्रमिक निर्धारण गरी अनुमोदन गर्ने, संस्था एकिकरण तथा विस्तार गर्ने लगायतका प्रस्तावहरु पारित गरेको थियो ।

सभामा कार्यसम्पादनको आधारमा उत्कृष्ट कर्मचारी, उत्कृष्ट सक्रिय सदस्यका साथै शेयर सदस्यका छोरा छोरीहरु मध्येवाट एसईई परिक्षामा उत्कृष्ट अंक प्राप्त गर्नेहरुलाई सम्मान, प्रशंसापत्रका साथै हौसलास्वरुप नगद प्रदान गरिएको थियो ।

‘आजको सुरक्षित बचत, भोलिको सम्बृद्धि सहितको सभ्य जीवन’ नारा रहेको संस्थाले काठमाडौंको तीनकुनेमा मूख्य कार्यालय, काठमाडौंको चावहिल र भक्तपुरको राधे–राधेमा सेवा केन्द्र खोली सदस्यहरुलाई आधुनिक र सरल सेवा प्रदान गर्दै आइरहेको छ ।

ध्रुबप्रसाद पोखरलेको अध्यक्षतामा नयाँ सञ्चालक समिति

यसैबीच सभाले ध्रुबप्रसाद पोखरेलको अध्यक्षतामा नयाँ सञ्चालक समिति चयन गरेको छ । त्यस्तै सञ्चालक समितिको उपाध्यक्षमा कल्पना रंजितकार, सचिवमा कृष्णबहादुर बिष्ट, कोषाध्यक्षमा प्रद्यिप्न भट्टराईलाई चयन गरेको छ भने सदस्यहरुमा प्रमिला चालिसे, चन्द्रकला ढकाल, गीता लम्साललाई चयन गरेको छ ।

त्यसैगरी लेखा समितिको संयोजकमा माधबप्रसाद खरेल र सदस्यहरुमा राजेश श्रेष्ठ र बालकुमारी अगस्तीलाई चयन गरेको छ ।

सभामा नवनिर्वाचित सञ्चालक समितिलाई निर्वाचन समितिका संयोजक सोमराज तिम्सिनाले सपथ खुवाउँदै बधाई तथा सफल कार्यकालको शुभकामना दिनुभएको थियो ।