काठमाडौं । नेपाल क्रसर तथा खानी उद्योग व्यवसायी महासंघको वार्षिक साधारण सभा र राष्ट्रिय महाधिवेशन हुने भएको छ । क्रसर व्यवसायीहरुको छाता संगठनको उक्त महाधिवेशन कात्तिक ३० गते महोत्तरीको बर्दिबासमा हुने भएको हो ।
साधारणसभा तथा महाधिवेशन कात्तिक ३० र मंसिर १ गते दुई दिन चल्नेछ । यो महाधिवेशनले नयाँ नेतृत्वसमेत चयन गर्ने भएको छ ।
२०७० सालमा स्थापना भएको महासंघको कार्यसमिति २१ सदस्यीय हुने विधानमा व्यवस्था छ । कार्यकाल तीन वर्षको हुन्छ । २०७७ माघ २० गते बुटवलमा महाधिवेशनबाट सिताराम न्यौपानेको नेतृत्वमा नयाँ कार्य समिति चुनिएको थियो ।
सधारणा सभा तथा महाधिवेशनमा देशभरबाट करिब ७८० जना प्रतिनिधिहरुको सहभागिता रहने छ । बर्दिबासको साधारण सभा र महाधिवेशनको सम्पूर्ण तयारी पूरा भइसकेको महासंघले जनाएको छ ।
साधारणसभा तथा महाधिवेशनको उदघाटन उद्योग, वाणिज्य तथा आपूर्तिमन्त्री दामोदर भण्डारीबाट गराउने महासंघको
योजना रहेको छ ।
महाधिवेशनमा राज्य व्यवस्था समितिका सभापति रामहरि खतिवडा, उद्योग बाणिज्य तथा उपभोक्त हित संरक्षण समितिका सभापति अब्दुल खान, मधेश प्रदेशका मुख्यमन्त्री सतिश सिंह, प्रदेश सरकारका मन्त्रीहरू साथै स्थानीय सरकारका प्रमुख र उपप्रमुखहरूलाई पनि निम्तो दिइएको छ ।
देशभरका क्रसर, बालुवा र खानी उद्योगी व्यवसायीहरूलाई एकताबद्ध गर्ने र आफ्ना हकहितका लागि पहल गर्ने उद्देश्यले महासंघ स्थापना गरिएको थियो ।
विगतमा दर्ता भएका तथा हाल नवीकरण नभएका खानी तथा क्रसर उद्योगहरुको नियमसम्मत ढंगले नवीकरण गराउने लगायतका मुख्य मागसहितका नीति तथा कार्यक्रम र भावी योजना महाधिवेशनमार्फत् तयार पार्ने कार्यक्रम रहेको बुझिएको छ ।
