काठमाडौं । रुसको एक अदालतले गुगललाई विश्वमा हालसम्मकै ठूलो रकमको जरिवाना तोकेको छ। रुसी सरकारी सञ्चार माध्यमलाई युट्युबमा प्रतिबन्ध लगाएको आरोपमा गुगलमाथि यो कारबाही गरिएको हो।

२५ डेसिलियन अमेरिकी डलरको जरिवाना

बीबीसीका अनुसार, रुसी अदालतले २८ अक्टोबरमा गुगललाई २.५ अण्डसिलियन रुबल, अर्थात् २५ डेसिलियन अमेरिकी डलर जरिबाना तिर्न आदेश दिएको छ। यो रकमको मात्रा गन्न पनि गाह्रो हुने किसिमको छ। १ अण्डसिलियनमा १ पछि ३६ वटा शून्य हुन्छन्, जसले गर्दा यो जरिवाना रकमलाई संख्यात्मक हिसाबले विश्वको कूल जीडीपीभन्दा पनि धेरै मानिएको छ।

९ महिनाभित्र जरिवाना तिर्नुपर्ने

अदालतले गुगललाई जरिवाना रकम तिर्न ९ महिनाको समयसीमा दिएको छ। यदि ९ महिनाभित्र जरिवाना नतिरेमा यो रकम दैनिक रूपमा दोब्बर हुँदै जाने चेतावनी दिएको छ।

रुसी सञ्चार माध्यम प्रतिबन्ध र अदालतको निर्णय

गुगलले रुसका केही सञ्चार माध्यमहरूलाई युट्युबमा प्रतिबन्ध लगाएको थियो, जसमा रुसी सरकारी सञ्चार माध्यमसमेत समावेश थिए। राष्ट्रवादी च्यानल जारग्रेड समेत युट्युबबाट हटाइएको थियो, जसपछि गुगलविरुद्ध अदालतमा मुद्दा चलाइएको थियो। अदालतले गुगललाई ती प्रतिबन्धित च्यानलहरू फुकुवा गर्न र जरिवाना रकम तिरेपछि मात्र रुसी बजारमा पुनः प्रवेश गर्न अनुमति दिने बताएको छ।

गुगलको रुसमा व्यापारको स्थिति

गुगलले सन् २०२२ मा रुसले युक्रेनमा आक्रमण सुरु गरेपछि रुसमा आफ्ना सबै व्यापारिक गतिविधि बन्द गरिसकेको छ। यस कारणले गुगलको रुसी बजारमा हाल कुनै व्यापारिक उपस्थिति छैन।