सिन्धुपाल्चोक । करिब आठ महिनादेखि तातोपानी भन्सार कार्यालयमा एक हजार तीन सय मेट्रिक टन रासायनिक मल गोदाममा थन्किएर बसेको छ । भन्सार कार्यालयको खुला गोदाममा थन्किएको ५० किलोका दुई हजार छ सय बोरा मल काम नलाग्ने अवस्थामा पुगेको छ ।
कृषि सामग्री केन्द्र र आयातकर्ता बिच मूल्य यकिनमा विवाद हुँदा सो रासायनिक मल भन्सार कार्यालयमै रोकिएको तातोपानी सुक्खा बन्दरगाह भन्सार कार्यालयका भन्सार अधिकृत सूर्यप्रसाद काफ्लेले जानकारी दिनुभयो । सिनोम्याक्स/सिल्क मार्केट र अर्को एक फर्मको जोइनभेन्चरमा चीनबाट सो मल आयात भएको थियो ।
गत वर्ष पनि करिब डेढ वर्षसम्म त्यत्ति नै परिणामको मल थन्किएको थियो । आयातकर्ता र कृषि सामग्री केन्द्रबिच आपसी समझदारीमा मल राजधानी पठाइएको थियो तर यस पटक भने लामो समयसम्म केन्द्र र आयातकर्ताबिच विवाद नटुङ्गिएपछि मल थन्किएको छ ।
आयातकर्ता र केन्द्रबिच मलको मूल्यको विषयलाई लिएर उच्च अदालतमा मुद्दा परेको थियो । अदालतले दुवैलाई मध्यमार्गी बाटो अपनाएर मलको विषय टुङ्गाउन आदेश दिएको छ । अदालतको आदेशबमोजिम केन्द्र र आयातकर्ताले समन्वयात्मक बाटोबाट समस्या समाधान गरेर मल राजधानी पठाउनुपर्ने छ तर अहिलेसम्म उनीहरू बिच समन्वयसमेत हुन सकेको छैन । त्यसकारण मल भन्सारकै गोदाम थन्किएको छ भने यत्ता कृषकहरू मल अभावमा बालीमा प्रयोग गर्न पाएका छैनन् ।
केन्द्रले सिनोम्याक्स/सिल्क मार्केट र अर्को एक फर्मलाई मल आयातका लागि ठेक्का दिएको थियो । तातोपानी भन्सारले उक्त मल जफत गरेर राजधानी पठाउन पनि सकेको छैन । जाँचपास गर्नेबाहेक भन्सार कार्यालयलाई जफत गर्ने अधिकार नदिएको भन्सार कार्यालयले जनाएको छ ।
केन्द्र र आयातकर्तालाई छिटो विवाद टुङ्गाएर मल जाँचपास गरेर राजधानी लैजान भन्सारले आग्रह गरिरहेको छ । कृषि सामग्री केन्द्रले परीक्षणकर्ता तोकेर मलको ल्याब टेस्ट गरेपछि बालीनालीमा प्रयोग गर्न उपयुक्त छ कि छैन भनेर यकिन गरेपछि मात्रै भन्सारले जाँचपास गर्ने छ ।
भन्सार अधिकृत काफ्लेका अनुसार सबै प्रक्रिया पूरा गरेर आएमा मल जाँचपास गरिने बताउनुभयो तर अहिलेसम्म दुई पक्षबिच सहमति भएर आएको छैन । त्यसकारण मल भन्सार गोदाममै थन्किएकाले भन्सारमा अरू सामान गोदाम गर्न समस्या भइरहेको छ ।
