काठमाडौं । सरकारले नेपाल विद्युत प्राधिकरणका कार्यकारी निर्देशक कुलमान घिसिङलाई तीनदिने स्पष्टीकरण सोध्ने भएको छ। बुधबार साँझ बसेको मन्त्रिपरिषद् बैठकले घिसिङलाई स्पष्टीकरणे सोध्ने निर्णय गरेको हो ।
यसअघि ऊर्जा मन्त्रालयले पनि उनलाई स्पष्टीकरण सोधेको थियो । जवाफमा उनले उचित प्रतिवादको मौका आफूले नपाएको बताएका थिए ।
‘‘मेरो पूर्व स्पष्टीकरण के कति कारणले चित्तबुझ्दो भएन ? स्पष्टिकरणमा आधार र कारण खुलेको छैन। आधार र कारणको अभावमा थप पुष्ट्याईं पेश गर्ने अवस्था भएन। आधार र कारणको अभावमा उचित प्रतिवादको मौका रहेन,’ उनले जवाफमा भनेका थिए।
यसैबीच कार्यकारी निर्देशक घिसिङलाई ऊर्जा जलस्रोत तथा सिँचाइ मन्त्रालयले शून्य नम्बर दिएको थियो ।
आर्थिक वर्ष २०८०÷०८१ को कार्य सम्पादन मूल्यांकनका आधारमा घिसिङले शून्य नम्बर पाएका थिए ।
घिसिङले मन्त्रालयलाई ९८.९९ प्रतिशत अंक दाबी गरी मूल्यांकनका लागि मुख्य कार्यसम्पादन सूचकांक समेटिएको विवरण पेस गरेका थिए।
सम्झौताअनुसार ढिला विवरण बुझाएको भन्दै उनलाई शून्य नम्बर दिएको मन्त्रालयले बताएको छ । प्रतिनिधिसभाको बैठकमा समेत उर्जा मन्त्री दिपक खड्काले ‘परीक्षामा विद्यार्थी उपस्थित नभए कति नम्बर दिने त ? भनि जवाफ दिएका थिए ।
प्रतिपक्ष दलका सांसदहरुले उनलाई निकाले सडक र सदनबाट आन्दोलन गर्ने चेतावनी दिएका थिए ।
घिसिङलाई प्राधिकरणको कार्यकारी निर्देशकमा २०७८ साउन २५ मन्त्रिपरिषद्को निर्णयबाट नियुक्त गरिएको हो । उनी चारवर्षका लागि दोस्रो पटक नियुक्त भएका थिए ।
