काठमाडौं । नेपाल रग्बी संघको वर्ष उत्कृष्ट खेलाडी महिलामा सिर्जना राई र पुरुषमा रोहन डंगोल भएका छन्।
काठमाडौंमा शनिबार सम्पन्न आफ्नो १२औं वार्षिक साधारणसभाको अवसरमा संघले वर्ष २०२४ को उत्कृष्ट खेलाडीबाट सिर्जना र रोहनलाई सम्मान गरेको हो। राष्ट्रिय खेलकुद परिषद् (राखेप) का सदस्यसचिव टंकलाल घिसिङ, राखेपकी बोर्ड सदस्य अञ्जना श्रेष्ठ मास्के, नेपाल रग्बी संघका अध्यक्ष दीपक देवकोटा, वरिष्ठ उपाध्यक्ष चेतनराज गिरी र महासचिव गोविन्दबहादुर घिमिरेलगायतले उनीहरूलाई सम्मान गरे।
उक्त साधारण सभाको सदस्यसचिव घिसिङले उद्घाटन गरेका थिए। सो अवसरमा घिसिङले रग्बी खेलको विकासका लागि योगदान गर्ने खेलाडी, प्रशिक्षक र संघलाई धन्यवाद दिँदै पछिल्ला १२ वर्ष विभिन्न आरोह-अवरोह पार गरेको बताए।
