काठमाडौं । साविक विजेता अर्जेन्टिनाले बुधबार अल्जेरियासँग खेल्दै विश्वकप उपाधि रक्षा अभियानको सुरुआत गर्दैछ। समूह ‘जे’ अन्तर्गतको खेल अमेरिकाको मिसौरी राज्यस्थित कन्सास रंगशालामा हुनेछ। नेपाली समयअनुसार खेल बिहान ६ः४५ बजे सुरु हुनेछ।

अर्जेन्टिना लगातार दोस्रो विश्वकप जित्ने लक्ष्यसहित मैदान उत्रँदै छ। यदि सफल भएमा इटाली र ब्राजिलपछि लगातार विश्वकप जित्ने तेस्रो राष्ट्र बन्नेछ। यता अल्जेरियाको लक्ष्य भने आफ्नो इतिहासमा दोस्रो पटक नकआउट चरणमा पुग्ने रहेको छ।

दक्षिण अमेरिकी छनोटमा उत्कृष्ट प्रदर्शन गर्दै शीर्ष स्थान हासिल गरेको अर्जेन्टिना १४औं पटक विश्वकपमा सहभागी हुँदैछ। कप्तान लियोनल मेसीको नेतृत्वमा रहेको टोलीले छनोट चरणमा १८ खेलबाट ३८ अंक जोड्दै विश्वकप यात्रा तय गरेको थियो। यस क्रममा चिरप्रतिद्वन्द्वी ब्राजिललाई ४–१ ले पराजित गरेको प्रदर्शन विशेष चर्चामा रह्यो।

छनोटपछि खेलेका सातवटै अन्तर्राष्ट्रिय मैत्रीपूर्ण खेल जितेको अर्जेन्टिनाले २१ गोल गर्दा केवल एक गोल मात्र व्यहोरेको थियो, जसले टोलीको उत्कृष्ट लयलाई पुष्टि गर्छ।

यद्यपि अर्जेन्टिनाले गत विश्वकपको पहिलो खेलमा साउदी अरेबियासँग भोगेको अप्रत्याशित हार बिर्सिएको छैन। त्यसैले अफ्रिकी राष्ट्र अल्जेरियालाई हल्का रूपमा लिने पक्षमा टोली देखिएको छैन।

मेसीको ऐतिहासिक उपलब्धिको संघार

अल्जेरियाविरुद्ध मैदान उत्रिए कप्तान लियोनल मेसीले आफ्नो २००औं अन्तर्राष्ट्रिय खेल खेल्नेछन्। साथै यो उनको २७औं विश्वकप खेल हुनेछ। ह्यामस्ट्रिङ चोटबाट पुनरागमनको क्रममा रहेका मेसीले खेल्ने अवसर पाए विश्वकपका ६ संस्करण खेल्ने पहिलो फुटबलर बन्ने कीर्तिमान पनि बनाउनेछन्।

गोलकिपर इमिलियानो मार्टिनेज पूर्ण रूपमा फिट भएका छन् भने लियान्ड्रो पेरेडेज र निकोलस गान्जालेज पनि टोलीका लागि उपलब्ध हुने अपेक्षा गरिएको छ। तर लेफ्ट ब्याक निकोलस टाग्लियाफिको चोटका कारण बाहिर रहने सम्भावना छ।

अल्जेरियाको आत्मविश्वास उच्च

फिफा वरीयताको २८औं स्थानमा रहेको अल्जेरिया पाँचौं पटक विश्वकप खेल्दैछ। सन् २०१४ मा पहिलो पटक नकआउट चरण पुगेको टोली त्यसपछिका दुई संस्करणमा छनोट हुन असफल भएको थियो।

यसपटक भने अल्जेरियाले प्रभावशाली छनोट यात्रा तय गरेको छ। समूह विजेता बनेको टोलीका स्ट्राइकर मोहम्मद अमौराले १० गोल गर्दै छनोट चरणका सर्वाधिक गोलकर्तामध्ये एक बने।

प्रशिक्षक भ्लादिमिर पेट्कोभिकको नेतृत्वमा रहेको अल्जेरियाले विश्वकपअघिका चारमध्ये तीन मैत्रीपूर्ण खेल जितेको थियो। यस क्रममा युरोपेली टोली नेदरल्यान्ड्सलाई समेत पराजित गरेर टोलीले आत्मविश्वास बढाएको छ।

एक मात्र भेटमा अर्जेन्टिनाको जित

अर्जेन्टिना र अल्जेरिया अहिलेसम्म एकपटक मात्र आमनेसामने भएका छन्। सन् २००७ मा भएको मैत्रीपूर्ण खेलमा अर्जेन्टिना ४–३ ले विजयी भएको थियो। उक्त खेलमा मेसीले दुई गोल गरेका थिए।

अल्जेरियाका कप्तान रियाद माहरेज र गोल मेसिन मोहम्मद अमौरा टोलीका प्रमुख खेलाडीका रूपमा हेरिएका छन्। यद्यपि रक्षक रामी बेन्सेबैनी घुँडाको चोटका कारण खेल गुमाउने सम्भावना रहेको छ।

समूह ‘जे’ अन्तर्गत बुधबार हुने अर्को खेलमा अस्ट्रियाले जोर्डनसँग प्रतिस्पर्धा गर्नेछ। उक्त खेल नेपाली समयअनुसार बिहान ९ः४५ बजे सुरु हुनेछ।