काठमाडौँ । आज बिहीबारदेखि देशभर लगातार चार दिन सार्वजनिक बिदा सुरु भएको छ । गृह मन्त्रालयको निर्णय तथा पूर्वनिर्धारित सार्वजनिक बिदा तालिकाअनुसार सरकारी कार्यालय, सार्वजनिक निकाय तथा अधिकांश संस्थानहरू आइतबारसम्म बन्द रहने भएका हुन् ।
आज जेठ १४ गते इस्लाम धर्मावलम्बीहरूको महान् पर्व बकर इद (इद–उल–अज्हा) का अवसरमा सरकारले देशभर सार्वजनिक बिदा दिएको हो ।
त्यसैगरी, भोलि जेठ १५ गते गणतन्त्र दिवस परेको छ । गणतन्त्र दिवसको अवसरमा पनि सरकारले यसअघि नै राजपत्रमा सूचना प्रकाशित गर्दै सार्वजनिक बिदा दिने निर्णय गरिसकेको छ ।
त्यसपछि जेठ १६ गते शनिबार र जेठ १७ गते आइतबार नियमित साप्ताहिक बिदा परेकाले लगातार चार दिन सरकारी सेवा प्रभावित हुने भएको छ ।
अब सरकारी कार्यालय तथा सार्वजनिक निकायहरू सोमबारदेखि मात्रै नियमित रूपमा सञ्चालनमा आउनेछन् ।
