काठमाडौं । अमेरिकाका राष्ट्रपति डोनाल्ड ट्रम्पले इरानसँगको युद्ध चाँडै समाप्त हुने बताएका छन्।
उनले बुधबार साँझ होर्मुजको जलमार्ग र इरानको आणविक कार्यक्रममा सम्झौता गर्न प्रयास गरिरहेको बताए।
'के भइरहेको छ भनेर देख्दा, तपाईंले बुझ्नुहुनेछ कि हामी यो धेरै महत्वपूर्ण कारणले गरिरहेका छौं, हामी उनीहरूलाई आणविक हतियार बनाउन दिन सक्दैनौं। धेरैजसो मानिसहरूलाई थाहा छ कि हामी सही काम गरिरहेका छौं, र यो चाँडै अन्त्य हुनेछ,' ट्रम्पले रिपब्लिकन जर्जिया गभर्नर उम्मेदवार बर्ट जोन्सलाई समर्थन गर्ने कार्यक्रममा भने।
सीएनएनका अनुसार इरानले बिहीबार मध्यस्थकर्ताहरूलाई अमेरिकी प्रस्तावको जवाफ दिनेछ।
इरानको विदेश मन्त्रालयका प्रवक्ता इस्माइल बकाईले आफूहरू यस अमेरिकी प्रस्तावमा पाकिस्तानी मध्यस्थकर्ताहरूसँग विचार साझा गर्ने बताए।
सीएनएनले एक स्रोतलाई उद्धृत गर्दै अमेरिका र इरान दुवै युद्ध अन्त्य गर्न सम्झौतातर्फ अघि बढिरहेको बताएको छ भने इरानले अमेरिकाले दिएको प्रस्तावमाथि अझै विचार गरिरहेको बताएको छ।
