काठमाडौं । बागमती नदी किनारमा रहेका अव्यवस्थित तथा जोखिमयुक्त बस्ती हटाउने अभियानसँगै प्रभावित नागरिकहरूको व्यवस्थापन प्रक्रिया पनि अघि बढाइएको छ।
सरकारी तथ्यांकअनुसार हालसम्म आफूलाई सुकुम्बासी दाबी गर्ने १८१६ परिवारका ७७८९ जना सम्बन्धित निकायको सम्पर्कमा आएका छन्।
सम्पर्कमा आएका व्यक्तिहरूमध्ये ७९४ जनालाई विभिन्न स्थानमा स्थापना गरिएका अस्थायी होल्डिङ सेन्टरमा राखिएको छ। तीमध्ये राधास्वामी सत्संग भवन, नयाँ बसपार्क तथा माछापोखरी आसपासका होटल, नेपाल विद्युत प्राधिकरण को भक्तपुरस्थित तालिम केन्द्र र बोडेको कृषि तालिम केन्द्र प्रयोगमा ल्याइएको छ।
यसैबीच, दशरथ रंगशाला मा सञ्चालन गरिएको स्क्रिनिङ सेन्टरमा पुगेका केही व्यक्तिहरूले तत्काल सरकारी आवासमा नबसी आफैं वैकल्पिक बसोबासको व्यवस्था गर्ने जनाएका छन्।
सरकारले नदी किनारका अतिक्रमित तथा जोखिमयुक्त क्षेत्र खाली गराउने लक्ष्यसहित अभियान सञ्चालन गरिरहेको जनाएको छ। प्रभावित नागरिकहरूको दीर्घकालीन पुनर्स्थापनाका लागि थप योजना निर्माणको प्रक्रिया जारी रहेको बताइएको छ।
