काठमाडौं । उत्तर कोरियाले आइतबार बिहान आफ्नो पूर्वी तटबाट समुद्रतर्फ धेरै शंकास्पद ब्यालिस्टिक क्षेप्यास्त्र प्रक्षेपण गरेको जापान र दक्षिण कोरियालले आरोप लगाएका छन्।
जापानी र दक्षिण कोरियाली अधिकारीका अनुसार यो यस महिनाको चौथो र यस वर्षको सातौँ प्रक्षेपण हो।
जापानको रक्षा मन्त्रालयले आइतबार बिहान उत्तर कोरियाबाट क्षेप्यास्त्र प्रहार भएको घोषणा गरेको थियो। जापानी तटरक्षक बलले ती क्षेप्यास्त्रले जापान वरपरको क्षेत्रमा कुनै प्रभाव नपार्ने पुष्टि गरे।
जापानी प्रधानमन्त्री साने ताकाइचीले सामाजिक सञ्जालमार्फत स्थानीय समय अनुसार बिहान ६ बजेतिर धेरै वस्तुहरू प्रक्षेपण गरिएको र ती जापानको विशेष आर्थिक क्षेत्र बाहिर खसेको बताएकी छन्। ताकाइचीले घटनापछि जानकारी संकलन गर्न प्रधानमन्त्री कार्यालयको संकट व्यवस्थापन केन्द्रमा आपतकालीन प्रतिक्रिया टोली बोलाएकी छन्।
दक्षिण कोरियाका ज्वाइन्ट चिफ्स अफ स्टाफ (जेसीएस) ले पनि स्थानीय समय अनुसार बिहान ६:१० बजेतिर पूर्वी तटमा रहेको सिन्फो क्षेत्रबाट धेरै अज्ञात ब्यालिस्टिक मिसाइलहरू प्रहार भएको पुष्टि गरे। दक्षिण कोरियाली सेनाले आफ्नो निगरानी स्थितिलाई बलियो बनाएको र अमेरिका तथा जापानसँग जानकारी आदानप्रदान गरिरहेको बताएको छ।
यो प्रक्षेपण उत्तर कोरियाले क्लस्टर हतियार र विमान विरोधी क्षेप्यास्त्र प्रणालीले सुसज्जित ह्वासोङ-११ए को परीक्षण गरेको ११ दिनपछि भएको हो। मिडिया रिपोर्टका अनुसार दक्षिण कोरियाको राष्ट्रपति कार्यालयले यस विषयमा आपतकालीन सुरक्षा बैठक समेत आयोजना गरेको छ।
यस्ता परीक्षणहरूले उत्तर कोरियाको क्षेप्यास्त्र कार्यक्रम विरुद्ध संयुक्त राष्ट्र सुरक्षा परिषद्को प्रस्तावहरूको उल्लंघन गर्छन्। तर, उत्तर कोरियाले संयुक्त राष्ट्र संघको प्रतिबन्धलाई अस्वीकार गर्दै यसलाई आत्मरक्षाको सार्वभौम अधिकार भएको दाबी गर्दै आएको छ।
चीन र अमेरिकाले मे महिनाको मध्यमा हुने शिखर सम्मेलनको तयारी गरिरहेका बेला यी प्रक्षेपणहरू भएका हुन्। उक्त सम्मेलनमा चिनियाँ राष्ट्रपति सी जिनपिङ र अमेरिकी राष्ट्रपति डोनाल्ड ट्रम्पबिच उत्तर कोरियाबारे छलफल हुने अपेक्षा गरिएको छ।
यसैबिच, अन्तर्राष्ट्रिय आणविक ऊर्जा एजेन्सीका प्रमुख राफेल ग्रोसीले उत्तर कोरियाले आणविक हतियार बनाउने क्षमतामा धेरै गम्भीर प्रगति गरेको र नयाँ युरेनियम संवर्धन सुविधा थपिने सम्भावना रहेको बताए। मार्चको अन्त्यतिर उत्तर कोरियाली नेता किम जोङ उनले भनेका थिए, ‘आणविक हतियार सम्पन्न राज्यको रूपमा प्योङयाङको स्थिति अपरिवर्तनीय छ र राष्ट्रिय सुरक्षाको लागि आत्म-रक्षात्मक आणविक निवारक विस्तार गर्नु आवश्यक छ।’
क्युङनाम विश्वविद्यालयका प्राध्यापक लिम युल-चुल भन्छन्, ‘अमेरिका इरानमा केन्द्रित भएकोले, उत्तरले यसलाई आफ्नो आणविक शक्ति र क्षेप्यास्त्र क्षमताको स्तरोन्नति गर्ने सुनौलो समयको रूपमा हेर्छ।’ यस्ता गतिविधिका कारण यस क्षेत्रमा सुरक्षा संवेदनशीलता थप बढेको छ। एजेन्सी
