काठमाडौं : शिक्षा, विज्ञान तथा प्रविधि मन्त्री सस्मित पोखरेलको कुल २४ करोड १६ लाख रुपैयाँ बराबरको सम्पत्ति सार्वजनिक गरिएको छ। प्रधानमन्त्री तथा मन्त्रिपरिषद् कार्यालयले आइतबार सार्वजनिक गरेको विवरणअनुसार मन्त्री पोखरेलको नाममा तथा पारिवारिक स्वामित्वमा उल्लेखनीय चल–अचल सम्पत्ति रहेको देखिएको हो।
सार्वजनिक विवरणअनुसार मन्त्री पोखरेलको नाममा काठमाडौंमा करिब अढाई तले घर रहेको छ, जसको मूल्य ४ करोड रुपैयाँ उल्लेख गरिएको छ। त्यस्तै, मूलपानीमा ६ आना जग्गा (५ करोड रुपैयाँ) र मोरङमा १ कठ्ठा जग्गा (१ करोड रुपैयाँ) पनि उनको स्वामित्वमा रहेको छ।
पारिवारिक सम्पत्तितर्फ, उनका बुवाको नाममा काठमाडौंमा ४ आना २ पैसा जग्गा रहेको छ, जसको मूल्य करिब साढे २ करोड रुपैयाँ आँकिएको छ। आमा मिनाक्षी पोखरेलको नाममा गोदावरी र गोकर्णेश्वर क्षेत्रमा करिब ३ करोड रुपैयाँ बराबरको जग्गा रहेको विवरणमा उल्लेख छ। साथै, परिवारकै नाममा गोदावरीमा ११ रोपनी ४ आना क्षेत्रफलको जग्गा रहेको छ, जसको मूल्य ५ करोड रुपैयाँ देखाइएको छ।
मन्त्री पोखरेलसँग २५ तोला सुन र १०० तोला चाँदी रहेको छ, जसको कुल मूल्य करिब ७५ लाख रुपैयाँ रहेको छ। साथै, नगद २५ हजार रुपैयाँ रहेको पनि विवरणमा उल्लेख गरिएको छ। उनले आफ्नो सम्पत्ति पैतृक स्रोत, बुवाको आम्दानी तथा आमाबाट प्राप्त दाइजोबाट संकलन भएको बताएका छन्।
बैंक मौज्दाततर्फ सानिमा बैंक र एनआईसी एसिया बैंकमा गरी ४ लाख ४८ हजार रुपैयाँ जम्मा रहेको छ। त्यस्तै, विभिन्न कम्पनीमा परिवारको नाममा १ करोड ७७ लाख रुपैयाँ बराबरको सेयर लगानी गरिएको छ।
सवारी साधनतर्फ, बुवाको नाममा करिब ७० लाख रुपैयाँ मूल्यको एक विद्युतीय कार र मन्त्री पोखरेलको नाममा झन्डै ४० लाख रुपैयाँ पर्ने अर्को कार रहेको छ। साथै, उनले ७५ लाख रुपैयाँ ऋण रहेको पनि विवरणमा उल्लेख गरेका छन्।
सम्पूर्ण चल–अचल सम्पत्ति तथा दायित्व समेट्दा मन्त्री पोखरेलको कुल सम्पत्ति २४ करोड १६ लाख रुपैयाँ पुगेको सार्वजनिक विवरणमा उल्लेख गरिएको छ।
