काठमाडौं । अमेरिकी रक्षा मन्त्री पिट हेगसेथले इरानसँगको युद्ध चर्किएकै अवस्थामा सेना प्रमुख जनरल र्यान्डी जर्जलाई पदबाट हटाएका छन्। हेगसेथले जर्जलाई राजीनामा दिन र तत्काल अवकाश लिन निर्देशन दिएपछि यो कदम चालिएको हो।
रक्षा मन्त्रालयका प्रवक्ता सीन पार्नेलले एक विज्ञप्ति जारी गर्दै भनेका छन्, ‘जनरल र्यान्डी जर्जले ४१ औं सेना प्रमुखको रूपमा तत्काल लागू हुने गरी अवकाश लिँदै हुनुहुन्छ। राष्ट्रका लागि उहाँले पुर्याउनुभएको दशकौँ लामो सेवाप्रति विभाग कृतज्ञ छ र उहाँको सुखद अवकाशको कामना गर्दछ।’
इरानसँगको युद्ध सुरु भएको एक महिनाभन्दा धेरै समय भएसँगै भएको यो कारबाहीलाई विशेष मानिएको छ। अमेरिकी सेनाले सम्भावित जमिनी आक्रमणका लागि हजारौँ सैनिकहरू मध्यपूर्व पठाइरहेको संवेदनशील समयमा यो बर्खास्ती भएको छ। युद्धको समयमा यसरी उच्च सैन्य नेतृत्व परिवर्तन गर्नुलाई असामान्य मानिन्छ।
सन् २०२३ मा तत्कालीन राष्ट्रपति जो बाइडेनले नियुक्त गरेका जर्जको कार्यकाल २०२७ सम्म थियो। तर हेगसेथले रक्षा मन्त्रालय सम्हालेयता सैन्य नेतृत्वमा गरिरहेको ठुलो हेरफेरको सिलसिलामा जर्ज पनि परेका हुन्। जर्जसँगै अन्य दुई उच्च जनरलहरू जनरल डेभिड होड्ने र मेजर जनरल विलियम ग्रीनलाई पनि पदबाट हटाइएको छ।
यसअघि हेगसेथले जोइन्ट चिफ्स अफ स्टाफका अध्यक्ष जनरल सीक्यू ब्राउन र नौसेना प्रमुख एडमिरल लिसा फ्रान्चेट्टीलाई समेत बर्खास्त गरिसकेका थिए। जर्जको स्थानमा अब सेनाका उप प्रमुख जनरल क्रिस्टोफर लानेभले कार्यवाहक सेना प्रमुखको जिम्मेवारी सम्हाल्ने छन्। लानेभ यसअघि हेगसेथका वरिष्ठ सैन्य सहयोगी थिए।
रक्षा अधिकारीहरूका अनुसार, ‘उप प्रमुखले यो भूमिका ग्रहण गर्नु अपेक्षित र उचित कार्य हो।’ जर्जले यसअघि पूर्व रक्षा मन्त्री लोयड अस्टिनको वरिष्ठ सैन्य सहयोगीका रूपमा काम गरेका थिए। जर्ज एक अनुभवी पैदल फौज अधिकारी हुन् जसले इराक र अफगानिस्तान युद्धमा समेत नेतृत्वदायी भूमिका निर्वाह गरेका थिए।
हेगसेथले ट्रम्प प्रशासनको दृष्टिकोणअनुसार सेनालाई पुनर्संरचना गर्न खोजिरहेको चर्चा छ। जर्जले सेनाको भर्ती संकट समाधान र ड्रोन जस्ता आधुनिक हतियारमा जोड दिएका थिए। तर आधिकारिक रूपमा बर्खास्तीको कारण खुलाइएको छैन। यो घटनाले पेन्टागनमा निरन्तर हेरफेर भइरहेको देखाउँछ। एजेन्सी
