काठमाडौं । भारतको झारखण्ड राज्यको चतरा जिल्लामा एयर एम्बुलेन्स विमान दुर्घटनाग्रस्त हुँदा त्यसमा सवार सबै सात जनाको मृत्यु भएको छ। दुर्घटनामा परेको विमान रेडबर्ड कम्पनीको बीचक्राफ्ट किङ एयर बी९०एल मोडेलको चार्टर्ड एयर एम्बुलेन्स थियो।

उडानपछि २३ मिनेटमै सम्पर्क विच्छेद

स्थानीय समयअनुसार सोमबार साँझ ७:११ बजे राँचीबाट दिल्लीका लागि उडेको विमान साँझ ७:३४ बजे राडार सम्पर्कबाट हराएको थियो। उडानपछि विमानले कोलकाता एयर ट्राफिक कन्ट्रोलसँग सम्पर्क स्थापित गरेको थियो। तर खराब मौसमका कारण बाटो परिवर्तन (डाइभर्जन) गर्न अनुमति मागेपछि केही समयमै सम्पर्क टुटेको बताइएको छ।

विमान वाराणसीबाट करिब १०० समुद्री माइल दक्षिण–पूर्व क्षेत्रमा रहेको बेला राडार सम्पर्क विच्छेद भएको थियो। त्यसको केही समयपछि झारखण्डको चतरा जिल्लास्थित सिमरिया क्षेत्रको जंगलमा विमान दुर्घटनाग्रस्त अवस्थामा फेला परेको हो।

मृतकको पहिचान

दुर्घटनामा मृत्यु हुनेमा:

• क्याप्टेन विवेक विकास भगत (पाइलट)

• क्याप्टेन सबराजदीप सिंह (सह–पाइलट)

• सञ्जय कुमार (बिरामी)

• अर्चना देवी (आफन्त)

• धुरु कुमार (आफन्त)

• विकास कुमार गुप्ता (डाक्टर)

• सचिन कुमार मिश्र (प्यारामेडिकल स्टाफ)

उनीहरू सबैको घटनास्थलमै मृत्यु भएको जिल्ला प्रशासनले जनाएको छ।

बिरामीलाई दिल्ली लैजाँदै गर्दा दुर्घटना

राँचीस्थित देवकमल अस्पतालका सीईओ अनन्त सिन्हाका अनुसार ४१ वर्षीय सञ्जय कुमारलाई फेब्रुअरी १६ मा ६५ प्रतिशत जलेको अवस्थामा अस्पतालमा भर्ना गरिएको थियो। लातेहार जिल्लाको चाँदवा निवासी उनीलाई थप उपचारका लागि परिवारले दिल्ली लैजाने निर्णय गरेको थियो।

दिउँसो करिब ४:३० बजे अस्पतालबाट एयर एम्बुलेन्समार्फत दिल्ली पठाइएको बिरामीसहित सबै यात्रुको सोही साँझ दुर्घटनामा ज्यान गएको हो।

अनुसन्धानका लागि एएआईबी टोली पठाइँदै

दुर्घटनापछि जिल्ला प्रशासनको खोज तथा उद्धार टोली घटनास्थलमा पुगेको छ। नागरिक उड्डयन महानिर्देशनालय (डीजीसीए) ले खराब मौसमका कारण विमानले डाइभर्जन अनुमति मागेको पुष्टि गरेको छ।

दुर्घटनाको कारण पत्ता लगाउन एएआईबी (एयरक्राफ्ट एक्सिडेन्ट इन्भेस्टिगेशन ब्यूरो) को टोली घटनास्थल पठाइँदै छ। अधिकारीहरूले विस्तृत अनुसन्धानपछि मात्रै दुर्घटनाको यथार्थ कारण खुल्ने बताएका छन्।