काठमाडौं । राष्ट्रिय स्वतन्त्र पार्टी (रास्वपा) ले आफ्नो ‘वाचापत्र’ तयारीको कामलाई तीव्रता दिएको छ।
पार्टीका उपसभापति डा. स्वर्णिम वाग्लेको नेतृत्वमा गठित ‘वाचापत्र मस्यौदा कार्यदल’ ले अहिले मस्यौदा लेखनको काम गरिरहेको हो।
कार्यदलमा डा. नन्दन यादव, डा. अरनिको पाण्डे लगायतका विषय विज्ञहरूको सहभागिता रहेको छ।
वाचापत्रलाई वस्तुपरक र व्यावहारिक बनाउनका लागि भौगोलिक, व्यावसायिक तथा क्षेत्रगत रूपमा विभिन्न सुझावहरू संकलन गरिएको छ।
साथै, पार्टीको आन्तरिक संयन्त्रबाट आएका सुझावहरूलाई समेत समेटेर मस्यौदालाई अन्तिम रूप दिने काम भइरहेको छ।
पार्टीका प्रवक्ता मनिष झाका अनुसार सबै प्रक्रिया पूरा गरी आगामी फागुनको पहिलो साताभित्र वाचापत्र सार्वजनिक गर्ने तयारी गरिएको छ।
