काठमाडौं । सरकारलाई तिर्नुपर्ने रकम लामो समयदेखि नतिरेका ५२ जना व्यक्तिको तीनपुस्ते विवरण सरकारले सार्वजनिक गरेको छ । महालेखा नियन्त्रकको कार्यालय अन्तर्गतको कुमारी चोक तथा केन्द्रीय तहसिल कार्यालय बबरमहलले आज सार्वजनिक सूचना जारी गर्दै उनीहरूलाई ३५ दिनभित्र साँवा र ब्याजसहित रकम बुझाउन निर्देशन दिएको हो ।
सार्वजनिक गरिएको विवरणमा नेपाल निर्माण व्यवसायी महासंघका अध्यक्ष रवि सिंह, पोखरास्थित दि फूलबारी लिमिटेडका पियुष बहादुर अमात्यसहित कर्मचारी, कृषि व्यवसायी तथा सशस्त्र प्रहरीसमेत रहेका छन् । सूचनामा उनीहरूको नाम, ठेगाना र सरकारलाई तिर्न बाँकी रकम स्पष्ट रूपमा उल्लेख गरिएको छ ।
कार्यालयका अनुसार तोकिएको समयभित्र रकम नबुझाएमा सम्बन्धित व्यक्तिहरूको चल तथा अचल सम्पत्ति दाबी गरी प्रचलित कानुनअनुसार असुल उपर गरिने चेतावनी दिइएको छ ।
यसअघि पनि सरकारी बक्यौता तिर्न बाँकी रहेकाहरूको लगत कायम गरी नाम वेबसाइटमा राख्ने, पटक–पटक सार्वजनिक सूचना प्रकाशित गर्ने तथा घर ठेगानामा पत्राचार गरी उपस्थित हुन आग्रह गरिएको थियो । तर ती प्रयासका बाबजुद पनि रकम असुली हुन नसकेपछि बाध्य भएर तीनपुस्ते विवरण सार्वजनिक गर्नुपरेको केन्द्रीय तहसिल कार्यालयले जनाएको छ ।
