काठमाडौँ। काठमाडौं निर्वाचन क्षेत्र नम्बर ३मा यसपटकको प्रतिनिधिसभा चुनाव निकै रोमाञ्चक बनिरहेको छ । यहाँ मुख्य प्रतिस्पर्धा उज्यालो नेपाल पार्टीका अध्यक्ष कुलमान घिसिङ र राष्ट्रिय स्वतन्त्र पार्टी (रास्वपा) का उम्मेदवार राजुनाथ पाण्डेबीच देखिएको छ । दुवैले आफ्नो उम्मेदवारी दर्ता गरे लगतै आ-आफ्नो प्रचार प्रसारमा लागि परिरहेका छन्, र यो क्षेत्र अब काठमाडौँमा चर्चाको केन्द्र बनेको छ ।

यस क्षेत्रमा सबैभन्दा बढी चर्चा भने राजुनाथ पाण्डेको छ । काठमाडौं महानगरपालिकाका पूर्व नगर प्रहरी प्रमुखका रूपमा उनले शहरको सुरक्षा, ट्राफिक व्यवस्था र फुटपाथ तथा जग्गा अतिक्रमण नियन्त्रणमा महत्वपूर्ण भूमिका निर्वाह गरेका थिए । रास्वपाबाट उम्मेदवारी दिएका राजुनाथले शहरलाई सफा, सुरक्षित र व्यवस्थित बनाउने योजनालाई अगाडि सारेका छन् । भ्रष्टाचार नियन्त्रण, सरकारी कामकाज सहजीकरण तथा व्यवस्थापन, ट्राफिक जाम घटाउने र युवाहरूलाई अवसर दिने जस्ता व्यवहारिक मुद्दाले उनलाई बलियो बनाएको छ । काठमाडौंका बासिन्दाहरूले दैनिक समस्या भोगिरहेका बेला राजुनाथको अनुभव र दृढ प्रतिबद्धताले धेरैलाई प्रभावित पारेको छ । उनको अभियानमा रास्वपाका कार्यकर्ताहरूको जोश र ऊर्जा देखिन्छ, जसले यो क्षेत्रमा उनको जितको सम्भावना बढाएको छ । राजुनाथले भनेका छन्, "काठमाडौंलाई वास्तविक रूपमा सुन्दर र सुरक्षित शहर बनाउने हो, र त्यसका लागि म पूर्ण रूपमा तयार छु ।"

कुलमान घिसिङ भने नेपाल विद्युत् प्राधिकरणमा कार्यकारी निर्देशक रहँदा लोडसेडिङ अन्त्य गरेर जनताको मन जितेका चर्चित व्यक्ति हुन् । उनले ऊर्जा क्षेत्रमा ठूलो योगदान दिएका कारण उनी 'उज्यालोका नायक' को रूपमा चिनिन्छन् । यसपटक उनी आफ्नै पार्टीबाट चुनाव लड्दै छन्, जसले ऊर्जा, पूर्वाधार विकास र युवा रोजगारीलाई मुख्य मुद्दा बनाएको छ । कुलमानको उम्मेदवारीले विशेष गरी प्राविधिक क्षेत्रका मतदातालाई आकर्षित गरेको छ, र उनले पहिलो पटक प्रत्यक्ष निर्वाचनमा होमिएका छन् ।

यस क्षेत्रमा अन्य उम्मेदवारहरू पनि सक्रिय छन् । नेपाली कांग्रेसबाट रमेश अर्यालले टिकट पाएका छन् । उनी पार्टीका पुराना तथा अनुभवी नेता हुन्, जसले शिक्षा, स्वास्थ्य र समग्र विकासलाई जोड दिएका छन् । कांग्रेसको परम्परागत आधार भएको यो क्षेत्रमा रमेशले आफ्नो प्रभाव पार्न सक्छन् । त्यस्तै, नेकपा (एमाले)बाट रामेश्वर फुयाँल जस्ता उम्मेदवार पनि मैदानमा छन्, जसले पूर्वाधार र स्थानीय विकासलाई मुख्य एजेन्डा बनाएका छन् । अन्य दलहरूबाट पनि केही उम्मेदवारहरू छन्, जसले आवास, रोजगारी र स्थानीय मुद्दालाई उठाइरहेका छन् । यद्यपि, मुख्य ध्यान भने कुलमान र राजुनाथमै केन्द्रित छ ।

फागुन २१ गते हुने यो चुनावले काठमाडौं-३ को मात्र होइन, समग्र राजनीतिक माहोललाई पनि प्रभाव पार्ने देखिन्छ । कुलमानको ऊर्जा सुधारको इतिहास र राजुनाथको शहर व्यवस्थापनको अनुभवबीचको यो भिडन्तले मतदातालाई नयाँ विकल्प दिने अवसर दिएको छ । अब मतदाताले कसलाई छनोट गर्छन्, त्यो हेर्न बाँकी छ र यसको नतिजा फागुन २१को चुनाबले बताउनेछ।