काठमाडौं । राप्रपा फुटाएर राप्रपा नेपाल गठन गरेको करिब चार वर्षपछि कमल थापा फेरि ‘पुरानै घर’ फर्किएका छन् । राप्रपा र राप्रपा नेपालबीच आज पार्टी एकताको लिखित सहमति हुँदै छ ।
सहमतिका विषयवस्तुहरू केही पनि सार्वजनिक गरिएको छैन । राप्रपा स्रोतले एक बुँदे सहमतिमा हस्ताक्षर हुन सक्ने बताए । मुलुकलाई अहिले बलियो प्रजातान्त्रिक शक्तिको आवश्यकता रहेको हुँदा पार्टी एकता गर्ने निर्णयमा पुगेको राप्रपा नेपालका महामन्त्री राजाराम बर्तौलाले बताए ।
बर्ताैलाका अनुसार आज सहमति पत्रमा हस्ताक्षर हुनेछ भने १६ पुसमा घोषणासभा आयोजना गरिनेछ । एकताको मोडालिटी दुवै पार्टीको वार्ता टोलीले टुंग्याउने उनले जानकारी दिए ।
राप्रपाको वार्ता टोलीमा बुद्धिमान तामाङ, विक्रम पाण्डे र ध्रुवबहादुर प्रधान छन् । यस्तै, राप्रपा नेपालको टोलीमा राजीव पराजुली, राजाराम बर्तौला र तेजकुमार कुर्म रहेका छन् ।
एकतापछि राप्रपामा कमल थापा पूर्वअध्यक्षको हैसियतमा रहने तय छ । राप्रपाको विधान अनुसार पूर्वअध्यक्ष पार्टीको कार्यसम्पादन समितिदेखि सबै केन्द्रीय समितिहरूमा पदेन सदस्य रहन्छन् । त्यसबाहेक अन्य नेताहरूको पदीय मिलानबारे टुंगो लाग्न बाँकी रहेको नेताहरूले बताएका छन् ।
राप्रपाका एक पदाधिकारीले भने, ‘यो निशर्तरुपमा हुन लागेको एकता हो, उहाँहरूले कुनै पनि पदका लागि बार्गेनिङ गर्नुभएको छैन । न्यायोचितरुपमा पदीय मिलान हुन्छ ।’
२०७८ सालमा भएको महाधिवेशनमा अध्यक्षमा राजेन्द्र लिङदेनसँग पराजित भएपछि कमल थापाले पार्टी परित्याग गरेका हुन् । उनले आफूलाई राजाले चुनाव हराएको भन्दै राजसंस्थाको एजेन्डा पनि त्यागेका थिए । त्यसपछि थापाले राप्रपाका आफू निकट नेताहरूलाई साथ लिएर ‘राप्रपा नेपाल’ ब्युँताए । तर, सो पार्टीले जनतामा खासै प्रभाव पार्न सकेन । थापा स्वयम्ले एमालेको चुनाव चिन्ह लिएर प्रतिनिधिसभा निर्वाचनमा भाग लिएका थिए । तर पनि पराजित भए ।
राजनीतिक अस्तित्वको संकट पर्दै गएपछि थापाले केही समयदेखि राप्रपामा फर्किने मनशाय बनाएका थिए । संयुक्त जनआन्दोलन समितिको ब्यानरमा यसै वर्ष भएको राजावादी आन्दोलनले थापा र लिङदेनलाई नजिक ल्याएको थियो । त्यहीँबाट एकताको ढोका खुलेको हो ।
राप्रपाले यो मंसिर १८ गतेभित्र नियमित महाधिवेशन गर्नुपर्ने थियो । तर, पार्टीको बैठकले अध्यक्ष लिङदेनको कार्यकाल ६ महिना थप गरेको छ । जसअनुसार आगामी जेठ १८ भित्र महाधिवेशन गर्नुपर्छ । अध्यक्ष लिङदेन फेरि अध्यक्ष बन्ने योजनामा छन् ।
