काठमाडौँ। तिहार सकिएलगत्तै तराई–मधेस क्षेत्रमा छठ पर्वको रौनक छाएको छ, जुन अहिले राजधानी काठमाडौँसहित पहाडी क्षेत्रहरूमा पनि लोकप्रिय बन्दै गइरहेको छ। कात्तिक शुक्ल चतुर्थीदेखि सुरु हुने चारदिने यो पर्वका लागि नदी, तलाउ र पोखरीहरूका किनारमा घाट सजाउने कार्य तीव्र गतिमा भइरहेको छ।  जनकपुरधाम, वीरगञ्ज, रौतहट, सुनसरी-मोरङसहितका क्षेत्रमा छठका लागि नदी, पोखरी र नहरका किनारमा घाटहरू सफासुग्घर गरिँदै छन्। पानीमै पूजा गरिने भएकाले घाटहरूको सजावटमा विशेष ध्यान दिइएको छ।
बजारमा छठ पूजाका लागि चाहिने बाँसका कोनिया, ढाकी, नाङ्लो, माटोका भाँडा र विभिन्न प्रकारका फलफूल तथा खाद्य सामग्रीको माग ह्वात्तै बढेको छ। विभिन्न स्थानमा छठ पर्वका गीतहरू गुञ्जिन थालेका छन्, जसले माहोललाई थप रमाइलो बनाएको छ। पहिले तराईमा मात्र सीमित मानिने छठ अहिले काठमाडौँ उपत्यकाको कमलपोखरी, गुह्येश्वरी र अन्य नदी किनारमा पनि धुमधामले मनाइन्छ, जहाँ घाटहरूको निर्माण र सजावट अन्तिम चरणमा पुगेको छ। 
पर्वको पहिलो दिन व्रतालुहरूले नुहाईधुवाई गरी चोखो खानेकुरा खान्छन्।