काठमाडौं । नेपाल प्रहरीमा ६ वटा अतिरिक्त महानिरीक्षक (एआईजी) को दरबन्दी खाली भएको महिना बिति सक्यो। उच्च प्रहरी अधिकृतहरू चैत ४ देखि निवर्तमान आईजीपी वसन्त कुँवरसँगै अवकाशमा गएका हुन् । एआईजीहरू टेकप्रसाद राई, बुद्धिराज गुरुङ, दुर्गा सिंह, कुबेर कडायत र जनक भट्टराई एकसाथ कुँवरसँगै अवकाशमा गएका हुन् ।
त्यस यता नेपाल प्रहरीका महत्त्वपूर्ण छ वटा विभाग झन्डै एक महिनादेखि सेकेन्ड इन कमान्डले ( डिआइजी ) नेतृत्व गरिरहेका छन् । प्रहरीमा एआइजी बढुवा विलम्ब हुँदा मानव स्रोत विभाग, प्रशासन विभाग, कार्य विभाग, अपराध अनुसन्धान विभाग, प्रदेश समन्वय विभाग र केन्द्रीय अनुसन्धान ब्युरो प्रहरी नायब महानिरीक्षक (डिआइजी) को भरमा पुगेका हुन् ।
एआईजीको रिक्त दरबन्दीमा बढुवाको तीव्र प्रतिस्पर्धा देखिएको छ । एआईजी हुने प्रतिस्पर्धामा प्रहरी नायब महानिरीक्षक (डीआईजी)हरू चन्द्र कुबेर खापुङ, लालमणि आचार्य, कृष्णहरि शर्मा पोखरेल, दान बहादुर कार्की, डा. मनोज कुमार केसी, राजन अधिकारी र सिद्धिविक्रम शाह छन् ।
