काठमाडौं। साविक विजेता लिभरपूलले प्रिमियर लिगमा आइतबार आर्सनलमाथि १-० को जित हासिल गर्दै आफ्नो अपराजित लयलाई निरन्तरता दिएको छ। खेलको अन्तिम मिनेटहरूमा डोमिनिक सोजबोलाइसको गोलले लिभरपूललाई जित दिलायो।
लगातार तेस्रो जितसँगै लिभरपूल ९ अंक लिएर तालिकाको शीर्ष स्थानमा उभिएको छ।
एनफिल्डमा भएको खेलमा लिभरपूलका सोजबोलाइसले ८३औं मिनेटमा शानदार फ्री किक गोल गरे। यो गोल नै खेलको एकमात्र र निर्णायक गोल बन्यो, जसले लिभरपूललाई पूर्ण ३ अंक दिलायो।
तीन चरणको खेलपछि लिभरपूल प्रिमियर लिगमा शतप्रतिशत जित हासिल गर्ने एकमात्र टिम बनेको छ। पहिलो हार व्यहोरेको आर्सनल ३ खेलबाट ६ अंकसहित तालिकाको तेस्रो स्थानमा छ।
अर्कोतर्फ, क्रिस्टल प्यालेसले एस्टन भिल्लालाई ३-० ले हराउँदै प्रभावशाली प्रदर्शन गरेको छ।
