काठमाडौं । अमेरिकाले केही देशका नागरिकहरूका लागि भिजिटर तथा व्यापारिक भिसामा ५ हजार डलरसम्मको धरौटी प्रणाली लागू गर्ने भएको छ।
भिसा अवधि सकिएपछि तोकिएको समयभन्दा बढी अमेरिकामा बस्ने (ओभरस्टे) नागरिकको संख्या बढी भएका देशहरूलाई लक्षित गर्दै यो नयाँ नियम ल्याउन लागिएको हो। न्युयोर्क टाइम्सका अनुसार, अमेरिकी अधिकारीहरूले यो नीति लागू गर्ने निर्णयको उद्देश्य राष्ट्रिय सुरक्षा मजबुत पार्नु र भिसा दुरुपयोग रोक्नु भएको बताएका छन्।
पूर्व राष्ट्रपति डोनाल्ड ट्रम्प प्रशासनकालमा अगाडि सारिएको यो पाइलट कार्यक्रमअन्तर्गत, छनोट गरिएका देशका भिसा आवेदकहरूले ५ हजारदेखि १५ हजार अमेरिकी डलरसम्मको धरौटी बुझाउनुपर्नेछ।
यदि सम्बन्धित व्यक्तिले भिसाको अवधि सकिएपछि समयमै अमेरिका छाडेमा धरौटी रकम फिर्ता गरिनेछ।
यो ट्रायल कार्यक्रमको घोषणा सोमवार गरिएको हो, जसलाई प्रारम्भिक रूपमा सीमित देशहरूमा परीक्षणका रूपमा लागू गरिने जनाइएको छ। कुन देशमा यो लागू हुने हो भन्नेबारे विस्तृत जानकारी भने सार्वजनिक गरिएको छैन।
अमेरिकी सरकारका अनुसार, यो कदमले आप्रवासन नीतिलाई प्रभावकारी बनाउने र भिसा उल्लंघन कम गर्न सहयोग पुग्ने अपेक्षा गरिएको छ।
