पोखरा : सिन्धुलीको गोलन्जोर गाउँपालिका–६ छेत्पाबाट केही दिनअघि सम्पर्कविहीन भएका उर्मिला हायू र उनका परिवार पोखरा महानगरपालिका–३० गगनगौडामा फेला परेका छन्।
उनीहरू सोमबार बेलुका पोखरा–३० स्थित स्थानीय सोमनाथ पौडेल र चन्द्र भण्डारीको घरमा भेटिएका थिए। फेला परेका परिवारलाई ज्वाइँ नाता पर्ने धनबहादुर तामाङको जिम्मा लगाइएको पोखराका सहायक प्रमुख जिल्ला अधिकारी शिव लम्सालले जानकारी दिए।
पोखरा महानगरपालिका–३० का वडा अध्यक्ष दुर्गाप्रसाद सुवेदीको रोहबरमा हायू परिवारलाई आफन्तको जिम्मा लगाइएको हो।
धनबहादुर हराएकी कमला हायूका पति हुन्। प्रहरीका अनुसार, परिवारका सदस्यहरू बेला–बेला बिरामी भइरहने गरेकाले धामीको सल्लाहअनुसार गाउँ छाडेर हिँडेको उनीहरूले बताएका छन्।
स्थानीय प्रशासन र वडाको समन्वयमा परिवारलाई सुरक्षित रूपमा आफन्तको जिम्मा लगाइएको जनाइएको छ।
