वासिङ्टन डीसी। अमेरिकी राष्ट्रपति डोनाल्ड ट्रम्पले इरानमा हालै भएका सरकारविरोधी प्रदर्शनका क्रममा ३२ हजार जनाको मृत्यु भएको दाबी गरेका छन्। इरानमाथि सीमित सैन्य कारबाहीको सम्भावना व्यक्त गरिरहेकै बेला उनले यस्तो बताएका हुन्।

ह्वाइट हाउसमा पत्रकारहरूसँग कुरा गर्दै ट्रम्पले इरानको आणविक कार्यक्रम रोक्न दबाब दिन सैन्य परिचालनको तयारी भइरहेको संकेत गरे। उनले भने, “उनीहरूले निष्पक्ष सम्झौता गर्नुपर्छ। इरानका जनता आफ्ना नेताहरूभन्दा धेरै फरक छन्। छोटो अवधिमै त्यहाँ ३२ हजार मानिस मारिए, यो अत्यन्त दुःखद अवस्था हो।”

ट्रम्पले इरान सरकारले प्रदर्शनकारीलाई सामूहिक रूपमा फाँसी दिने योजना बनाएको दाबी गर्दै आफ्नो चेतावनीपछि सो कदम रोकिएको बताए। “उनीहरूले ८३७ जनालाई फाँसी दिने योजना बनाएका थिए। मैले सन्देश पठाएँ—यदि एक जनालाई पनि फाँसी दिइयो भने तुरुन्तै निशाना बनाइनेछ। त्यसपछि फाँसी रोकियो,” उनले भने।

तर इरान सरकारले भने प्रदर्शनका क्रममा तीन हजारभन्दा बढीको मृत्यु भएको स्वीकार गरेको छ।

यसअघि ट्रम्पले आगामी १० दिनभित्र समझदारी नभए अमेरिका ‘कडा कदम’ चाल्ने चेतावनी दिएका थिए।

उता इरानका विदेशमन्त्री Abbas Araghchiले सम्झौताको मस्यौदा तयार भइरहेको र अमेरिकी विशेष दूतलाई बुझाइने जानकारी दिएका छन्।

अमेरिका तथा केही युरोपेली मुलुकहरूले इरानले लुकिछिपी आणविक हतियार विकास गरिरहेको आरोप लगाउँदै आएका छन् भने इरानले उक्त आरोप अस्वीकार गर्दै आएको छ।