कैलाली : प्रधानमन्त्री केपी शर्मा ओलीले राष्ट्रिय गौरवको आयोजना रानी जमरा कुलरिया सिँचाइ आयोजनाको थप सिँचाइ सुविधा, जलविद्युत उत्पादन र प्रसारण लाइनको मंगलबार उद्घाटन गरेका छन्।

कार्यक्रमका दौरान प्रधानमन्त्री ओलीले आयोजनाबाट थप १४ हजार ३०० हेक्टरमा सिँचाइ सुविधा पुर्‍याउने तथा ४.७१ मेगावाट विद्युत उत्पादन र ३३ केभी क्षमताको प्रसारण लाइनको उद्घाटन गरे।

नहरमार्फत विद्युत उत्पादन

उक्त जलविद्युत आयोजना कैलालीको जानकी गाउँपालिका–९ कटासेमा रहेको सिँचाइ नहरमा निर्माण गरिएको हो। त्यहाँ उत्पादन गरिएको विद्युत ३३ केभी प्रसारण लाइनमार्फत राष्ट्रिय ग्रिडमा जोडिएको छ।

आयोजना तेस्रो चरणमा प्रवेश

रानी जमरा कुलरिया सिँचाइ आयोजनाको दोस्रो चरण सम्पन्न भइसकेको छ भने तेस्रो चरणका कार्यक्रमहरू सुरु भइसकेका छन्।
पहिलो र दोस्रो चरणमा टीकापुर, लम्कीचुहा र जानकी गाउँपालिकालाई सेवा दिइएको थियो। अब तेस्रो चरणमा भजनी, जोशीपुर, बर्दगोरिया, घोडाघोडी लगायतका पालिकाहरूमा सिँचाइ विस्तार गर्दै कृषि उत्पादनमा वृद्धि गर्ने लक्ष्य लिइएको छ।

ऐतिहासिक आयोजनाको आधुनिक रूप

प्रधानमन्त्री ओलीले रानी जमरा कुलरिया सिँचाइ प्रणालीलाई करिब १२० वर्षअगाडि स्थानीय किसानले सामूहिक प्रयास र परम्परागत सीपबाट थालेको बताउँदै अहिले यसलाई आधुनिक स्वरूपमा विस्तार गरिएको उल्लेख गरे।
उनले भने, “स्थानीय सहभागिता र सरकारको समन्वयबाट आजको सफलता सम्भव भएको हो।”

ग्रामीण विकास र ऊर्जा आत्मनिर्भरता

प्रधानमन्त्री ओलीले आयोजनालाई नेपालको ग्रामीण कृषि क्षेत्रको विकास, ऊर्जा आत्मनिर्भरता, खाद्य सुरक्षा र जीवनशैलीमा सकारात्मक परिवर्तन ल्याउने एक ऐतिहासिक उपलब्धिको रूपमा चित्रित गरे।

अन्य आयोजना छिटो सम्पन्न गर्न निर्देशन

प्रधानमन्त्री ओलीले सो अवसरमा सिक्टा, बबई, महाकाली तेस्रो, भेरी–बबई र सुनकोशी–मरिन बहुद्देश्यीय सिँचाइ आयोजना यथाशीघ्र सम्पन्न गर्न निर्देशन दिएका छन्।

यो आयोजनाको सफल कार्यान्वयनसँगै सुदूरपश्चिम लगायतका क्षेत्रमा जलस्रोतको सदुपयोग गर्दै कृषि र ऊर्जा क्षेत्रमा नयाँ ढोका खुलेको सरोकारवालाहरूको धारणा छ।